Naarayaneeyam-11 ( ēkādaśaṃ dashakam )
Om Shri Krishnaaya Parabrahmane Namaha
Atha Sriman Naaraayaneeyam ēkādaśaṃ Dashakam
sanakādīnāṃ vaikuṇṭhapravēśavarṇanaṃ
jayavijayaśāpa varṇanaṃ
hiraṇyakaśipu hiraṇyākṣōtpattivarṇanaṃ ca
 |
kramēṇa sargē parivardhamānē
kadāpi divyāssanakādayastē
bhavadvilōkāya vikuṇṭhalōkaṃ
prapēdirē mārutamandirēśa
|
manōjñanaiśrēyasakānanādyai –
ranēkavāpīmaṇimandiraiśca
anōpamaṃ taṃ bhavatō nikētaṃ
munīśvarāḥ prāpuratītakakṣyāḥ
|
bhavaddidṛkṣūnbhavanaṃ vivikṣūn
dvāḥsthau jayastān vijayō’pyarundhām
tēṣāṃ ca cittē padamāpa kōpaḥ
sarvaṃ bhavatprēraṇayaiva bhūman
|
vaikuṇṭhalōkānucitapracēṣṭau
kaṣṭau yuvāṃ daityagatiṃ bhajētam
iti praśaptau bhavadāśrayau tau
harismṛtirnō’stviti nēmatustān
|
tadētadājñāya bhavānavāptaḥ
sahaiva lakṣmyā bahirambujākṣa
khagēśvarāṃsārpitacārubāhu –
rānandayaṃstānabhirāmamūrtyā
|
prasādya gīrbhiḥ stuvatō munīndrā –
nananyanāthāvatha pārṣadau tau
saṃrambhayōgēna bhavaistribhirmā –
mupētamityāttakṛpaṃ nyagādīḥ
|
tvadīyabhṛtyāvatha kāśyapāttau
surārivīrāvuditau ditau dvau
sandhyāsamutpādanakaṣṭacēṣṭau
yamau ca lōkasya yamāvivānyau
|
hiraṇyapūrvaḥ kaśipuḥ kilaikaḥ
parō hiraṇyākṣa iti pratītaḥ
ubhau bhavannāthamaśēṣalōkaṃ
ruṣā nyarundhāṃ nijavāsanāndhau
|
tayōrhiraṇyākṣamahāsurēndrō
raṇāya dhāvannanavāptavairī
bhavatpriyāṃ kṣmāṃ salilē nimajya
cacāra garvādvinadan gadāvān
|
tatō jalēśāt sadṛśaṃ bhavantaṃ
niśamya babhrāma gavēṣayaṃstvām
bhaktaikadṛśyaḥ sa kṛpānidhē tvaṃ
nirundhi rōgān marudālayēśa
|
Om tatsadhithi srimannaaraayaneeye
ēkādaśaṃ dashakam samaaptham
Shri Haraye namaha Ramaa Ramana Govinda Govindaa
Sri Krishnaarpanamasthu
|
|
Please leave your valuable suggestions and feedback here