Thiru Devanaar Thogai ( Sri Deiva Naayaga Perumal Temple )
| Azhwar | Paasuram | Count |
|---|---|---|
| திருமங்கையாழ்வார் | பெரிய திருமொழி | 10 |
| Total | 10 | |
** போதலர்ந்த பொழில்சோலைப் புறமெங்கும் பொருதிரைகள் *
தாதுதிர வந்தலைக்கும் தடமண்ணித் தென்கரைமேல் *
மாதவன்றா னுறையுமிடம் வயல்நாங்கை * வரிவண்டு
தேதெனவென் றிசைபாடும் திருத்தேவ னார்தொகையே
யாவருமா யாவையுமா யெழில்வேதப் பொருள்களுமாய் *
மூவருமாய் முதலாய மூர்த்தியமர்ந் துறையுமிடம் *
மாவரும்திண் படைமன்னை வென்றிகொள்வார் மன்னுநாங்கை *
தேவரும்சென் றிறைஞ்சுபொழில் திருத்தேவ னார்தொகையே
வானாடும் மண்ணாடும் மற்றுள்ள பல்லுயிரும் *
தானாய வெம்பெருமான் தலைவனமர்ந் துறையுமிடம் *
ஆனாத பெருஞ்செல்வத் தருமறையோர் நாங்கைதன்னுள் *
தேனாரு மலர்பொழில்சூழ் திருத்தேவ னார்தொகையே
இந்திரனு மிமையவரும் முனிவர்களும் எழிலமைந்த *
சந்தமலர்ச் சதுமுகனும் கதிரவனும் சந்திரனும் *
எந்தையெமக் கருள், எனநின் றருளுமிடம் எழில்நாங்கை *
சுந்தரநல் பொழில்புடைசூழ் திருத்தேவ னார்தொகையே
அண்டமுமிவ் வலைகடலு மவனிகளும் குலவரையும் *
உண்டபிரா னுறையுமிடம் ஓளிமணிசந் தகில்கனகம் *
தெண்டிரைகள் வரத்திரட்டும் திகழ்மண்ணித் தென்கரைமேல் *
திண்திறலார் பயில்நாங்கைத் திருத்தேவ னார்தொகையே
ஞாலமெல்லா மமுதுசெய்து நான்மறையும் தொடராத *
பாலகனா யாலிலையில் பள்ளிகொள்ளும் பரமனிடம் *
சாலிவளம் பெருகிவரும் தடமண்ணித் தென்கரைமேல் *
சேலுகளும் வயல்நாங்கைத் திருத்தேவ னார்தொகையே
ஓடாத வாளரியி னுருவாகி யிரணியனை *
வாடாத வள்ளுகிரால் பிளந்தளைந்த மாலதிடம் *
ஏடேறு பெருஞ்செல்வத் தெழில்மறையோர் நாங்கைதன்னுள் *
சேடேறு பொழில்தழுவு திருத்தேவ னார்தொகையே
வாராரு மிளங்கொங்கை மைதிலியை மணம்புணர்வான் *
காரார்திண் சிலையிறுத்த தனிக்காளை கருதுமிடம் *
ஏராரும் பெருஞ்செல்வத் தெழில்மறையோர் நாங்கைதன்னுள் *
சீராரும் மலர்பொழில்சூழ் திருத்தேவ னார்தொகையே
கும்பமிகு மதயானை பாகனொடும் குலைந்துவீழ *
கொம்பதனைப் பறித்தெறிந்த கூத்தனமர்ந் துறையுமிடம் *
வம்பவிழும் செண்பகத்தின் மணங்கமழும் நாங்கைதன்னுள் *
செம்பொன்மதிள் பொழில்புடைசூழ் திருத்தேவ னார்தொகையே
** காரார்ந்த திருமேனிக் கண்ணனமர்ந் துறையுமிடம் *
சீரார்ந்த பொழில்நாங்கைத் திருத்தேவ னார்தொகைமேல் *
கூரார்ந்த வேற்கலியன் கூறுதமிழ் பத்தும்வல்லார் *
ஏரார்ந்த வைகுந்தத் திமையவரோ டிருப்பாரே