Narayaneeyam-15-SA

श्रीमन्नारायणीयम् – 15 ( पञ्चदशम् दशकम् )

ॐ श्रीकृष्णाय परब्रह्मणे नम:

अथ श्रीमन्नारायणीयम् पञ्चदशम् दशकम्

कपिलोपदेशम्

कपिल गीता

मतिरिह गुणसक्ता बन्धकृत्तेष्वसक्ता

त्वमृतकृदुपरुन्धे भक्तियोगस्तु सक्तिम्

महदनुगमलभ्या भक्तिरेवात्र साध्या

कपिलतनुरिति त्वं देवहूत्यै न्यगादी:

प्रकृतिमहदहङ्काराश्च मात्राश्च भूता-

न्यपि हृदपि दशाक्षी पूरुष: पञ्चविंश:

इति विदितविभागो मुच्यतेऽसौ प्रकृत्या

कपिलतनुरिति त्वं देवहूत्यै न्यगादी:

प्रकृतिगतगुणौघैर्नाज्यते पूरुषोऽयं

यदि तु सजति तस्यां तत् गुणास्तं भजेरन्

मदनुभजनतत्त्वालोचनै: साऽप्यपेयात्

कपिलतनुरिति त्वं देवहूत्यै न्यगादी:

विमलमतिरुपात्तैरासनाद्यैर्मदङ्गं

गरुडसमधिरूढं दिव्यभूषायुधाङ्कम्

रुचितुलिततमालं शीलयेतानुवेलं

कपिलतनुरिति त्वं देवहूत्यै न्यगादी:

मम गुणगणलीलाकर्णनै: कीर्तनाद्यै-

र्मयि सुरसरिदोघप्रख्यचित्तानुवृत्ति:

भवति परमभक्ति: सा हि मृत्योर्विजेत्री

कपिलतनुरिति त्वं देवहूत्यै न्यगादी:

अहह बहुलहिंसासञ्चितार्थै: कुटुम्बं

प्रतिदिनमनुपुष्णन् स्त्रीजितो बाललाली

विशति हि गृहसक्तो यातनां मय्यभक्त:

कपिलतनुरितित्वं देवहूत्यै न्यगादी:

युवतिजठरखिन्नो जातबोधोऽप्यकाण्डे

प्रसवगलितबोध: पीडयोल्लङ्घ्य बाल्यम्

पुनरपि बत मुह्यत्येव तारुण्यकाले

कपिलतनुरिति त्वं देवहूत्यै न्यगादी:

पितृसुरगणयाजी धार्मिको यो गृहस्थ:

स च निपतति काले दक्षिणाध्वोपगामी

मयि निहितमकामं कर्म तूदक्पथार्थं

कपिल्तनुरिति त्वं देवहूत्यै न्यगादी:

परम किमु बहूक्त्या त्वत्पदाम्भोजभक्तिं

सकलभयविनेत्रीं सर्वकामोपनेत्रीम्

वदसि खलु दृढं त्वं तद्विधूयामयान् मे

गुरुपवनपुरेश त्वय्युपाधत्स्व भक्तिम्

अथ श्रीमन्नारायणीये पञ्चदशम् दशकम् समाप्तम्

श्री हरये नमः रमा रमण गोविन्द गोविन्दा

श्री कृष्णार्पणमस्तु