Narayaneeyam-19-SA

श्रीमन्नारायणीयम् – 19 ( एकोनविंशम् दशकम् )

ॐ श्रीकृष्णाय परब्रह्मणे नम:

अथ श्रीमन्नारायणीयम् एकोनविंशम् दशकम्

प्राचेतसकथानु वर्णनं

पृथोस्तु नप्ता पृथुधर्मकर्मठ:

प्राचीनबर्हिर्युवतौ शतद्रुतौ

प्रचेतसो नाम सुचेतस: सुता-

नजीजनत्त्वत्करुणाङ्कुरानिव

पितु: सिसृक्षानिरतस्य शासनाद्-

भवत्तपस्याभिरता दशापि ते

पयोनिधिं पश्चिममेत्य तत्तटे

सरोवरं सन्ददृशुर्मनोहरम्

तदा भवत्तीर्थमिदं समागतो

भवो भवत्सेवकदर्शनादृत:

प्रकाशमासाद्य पुर: प्रचेतसा-

मुपादिशत् भक्ततमस्तव स्तवम्

स्तवं जपन्तस्तममी जलान्तरे

भवन्तमासेविषतायुतं समा:

भवत्सुखास्वादरसादमीष्वियान्

बभूव कालो ध्रुववन्न शीघ्रता

तपोभिरेषामतिमात्रवर्धिभि:

स यज्ञहिंसानिरतोऽपि पावित:

पिताऽपि तेषां गृहयातनारद-

प्रदर्शितात्मा भवदात्मतां ययौ

कृपाबलेनैव पुर: प्रचेतसां

प्रकाशमागा: पतगेन्द्रवाहन:

विराजि चक्रादिवरायुधांशुभि-

र्भुजाभिरष्टाभिरुदञ्चितद्युति:

प्रचेतसां तावदयाचतामपि

त्वमेव कारुण्यभराद्वरानदा:

भवद्विचिन्ताऽपि शिवाय देहिनां

भवत्वसौ रुद्रनुतिश्च कामदा

अवाप्य कान्तां तनयां महीरुहां

तया रमध्वं दशलक्षवत्सरीम्

सुतोऽस्तु दक्षो ननु तत्क्षणाच्च मां

प्रयास्यथेति न्यगदो मुदैव तान्

ततश्च ते भूतलरोधिनस्तरून्

क्रुधा दहन्तो द्रुहिणेन वारिता:

द्रुमैश्च दत्तां तनयामवाप्य तां

त्वदुक्तकालं सुखिनोऽभिरेमिरे

अवाप्य दक्षं च सुतं कृताध्वरा:

प्रचेतसो नारदलब्धया धिया

अवापुरानन्दपदं तथाविध-

स्त्वमीश वातालयनाथ पाहि माम्

अथ श्रीमन्नारायणीये एकोनविंशम् दशकम् समाप्तम्

श्री हरये नमः रमा रमण गोविन्द गोविन्दा

श्री कृष्णार्पणमस्तु