Narayaneeyam-21-SA

श्रीमन्नारायणीयम् – 21 ( एकविंशम् दशकम् )

ॐ श्रीकृष्णाय परब्रह्मणे नम:

अथ श्रीमन्नारायणीयम् एकविंशम् दशकम्

जम्बूद्वीपादिषु भगवढुपासनाप्रकार वर्णनं

मध्योद्भवे भुव इलावृतनाम्नि वर्षे

गौरीप्रधानवनिताजनमात्रभाजि

शर्वेण मन्त्रनुतिभि: समुपास्यमानं

सङ्कर्षणात्मकमधीश्वर संश्रये त्वाम्

भद्राश्वनामक इलावृतपूर्ववर्षे

भद्रश्रवोभि: ऋषिभि: परिणूयमानम्

कल्पान्तगूढनिगमोद्धरणप्रवीणं

ध्यायामि देव हयशीर्षतनुं भवन्तम्

ध्यायामि दक्षिणगते हरिवर्षवर्षे

प्रह्लादमुख्यपुरुषै: परिषेव्यमाणम्

उत्तुङ्गशान्तधवलाकृतिमेकशुद्ध-

ज्ञानप्रदं नरहरिं भगवन् भवन्तम्

वर्षे प्रतीचि ललितात्मनि केतुमाले

लीलाविशेषललितस्मितशोभनाङ्गम्

लक्ष्म्या प्रजापतिसुतैश्च निषेव्यमाणं

तस्या: प्रियाय धृतकामतनुं भजे त्वाम्

रम्ये ह्युदीचि खलु रम्यकनाम्नि वर्षे

तद्वर्षनाथमनुवर्यसपर्यमाणम्

भक्तैकवत्सलममत्सरहृत्सु भान्तं

मत्स्याकृतिं भुवननाथ भजे भवन्तम्

वर्षं हिरण्मयसमाह्वयमौत्तराह-

मासीनमद्रिधृतिकर्मठकामठाङ्गम्

संसेवते पितृगणप्रवरोऽर्यमा यं

तं त्वां भजामि भगवन् परचिन्मयात्मन्

किञ्चोत्तरेषु कुरुषु प्रियया धरण्या

संसेवितो महितमन्त्रनुतिप्रभेदै:

दंष्ट्राग्रघृष्टघनपृष्ठगरिष्ठवर्ष्मा

त्वं पाहि बिज्ञनुत यज्ञवराहमूर्ते

याम्यां दिशं भजति किंपुरुषाख्यवर्षे

संसेवितो हनुमता दृढभक्तिभाजा

सीताभिरामपरमाद्भुतरूपशाली

रामात्मक: परिलसन् परिपाहि विष्णो

श्रीनारदेन सह भारतखण्डमुख्यै-

स्त्वं साङ्ख्ययोगनुतिभि: समुपास्यमान:

आकल्पकालमिह साधुजनाभिरक्षी

नारायणो नरसख: परिपाहि भूमन्

प्लाक्षेऽर्करूपमयि शाल्मल इन्दुरूपं

द्वीपे भजन्ति कुशनामनि वह्निरूपम्

क्रौञ्चेऽम्बुरूपमथ वायुमयं च शाके

त्वां ब्रह्मरूपमपि पुष्करनाम्नि लोका:

अथ श्रीमन्नारायणीये एकविंशम् दशकम् समाप्तम्

श्री हरये नमः रमा रमण गोविन्द गोविन्दा

श्री कृष्णार्पणमस्तु