Narayaneeyam-26-SA

श्रीमन्नारायणीयम् – 26 ( षड्विंशम् दशकम् )

ॐ श्रीकृष्णाय परब्रह्मणे नम:

अथ श्रीमन्नारायणीयम् षड्विंशम् दशकम्

गजेन्द्रमोक्ष वर्णनं

इन्द्रद्युम्न: पाण्ड्यखण्डाधिराज-

स्त्वद्भक्तात्मा चन्दनाद्रौ कदाचित्

त्वत् सेवायां मग्नधीरालुलोके

नैवागस्त्यं प्राप्तमातिथ्यकामम्

कुम्भोद्भूति: संभृतक्रोधभार:

स्तब्धात्मा त्वं हस्तिभूयं भजेति

शप्त्वाऽथैनं प्रत्यगात् सोऽपि लेभे

हस्तीन्द्रत्वं त्वत्स्मृतिव्यक्तिधन्यम्

दग्धाम्भोधेर्मध्यभाजि त्रिकूटे

क्रीडञ्छैले यूथपोऽयं वशाभि:

सर्वान् जन्तूनत्यवर्तिष्ट शक्त्या

त्वद्भक्तानां कुत्र नोत्कर्षलाभ:

स्वेन स्थेम्ना दिव्यदेशत्वशक्त्या

सोऽयं खेदानप्रजानन् कदाचित्

शैलप्रान्ते घर्मतान्त: सरस्यां

यूथैस्सार्धं त्वत्प्रणुन्नोऽभिरेमे

हूहूस्तावद्देवलस्यापि शापात्

ग्राहीभूतस्तज्जले बर्तमान:

जग्राहैनं हस्तिनं पाददेशे

शान्त्यर्थं हि श्रान्तिदोऽसि स्वकानाम्

त्वत्सेवाया वैभवात् दुर्निरोधं

युध्यन्तं तं वत्सराणां सहस्रम्

प्राप्ते काले त्वत्पदैकाग्र्यसिध्यै

नक्राक्रान्तं हस्तिवर्यं व्यधास्त्वम्

आर्तिव्यक्तप्राक्तनज्ञानभक्ति:

शुण्डोत्क्षिप्तै: पुण्डरीकै: समर्चन्

पूर्वाभ्यस्तं निर्विशेषात्मनिष्ठं

स्तोत्रं श्रेष्ठं सोऽन्वगादीत् परात्मन्

श्रुत्वा स्तोत्रं निर्गुणस्थं समस्तं

ब्रह्मेशाद्यैर्नाहमित्यप्रयाते

सर्वात्मा त्वं भूरिकारुण्यवेगात्

तार्क्ष्यारूढ: प्रेक्षितोऽभू: पुरस्तात्

हस्तीन्द्रं तं हस्तपद्मेन धृत्वा

चक्रेण त्वं नक्रवर्यं व्यदारी:

गन्धर्वेऽस्मिन् मुक्तशापे स हस्ती

त्वत्सारूप्यं प्राप्य देदीप्यते स्म

एतद्वृत्तं त्वां च मां च प्रगे यो

गायेत्सोऽयं भूयसे श्रेयसे स्यात्

इत्युक्त्वैनं तेन सार्धं गतस्त्वं

धिष्ण्यं विष्णो पाहि वातालयेश

अथ श्रीमन्नारायणीये षड्विंशम् दशकम् समाप्तम्

श्री हरये नमः रमा रमण गोविन्द गोविन्दा

श्री कृष्णार्पणमस्तु