Narayaneeyam-7-SA

श्रीमन्नारायणीयम् – 7 ( सप्तमम् दशकम् )

अथ श्रीमन्नारायणीयम् सप्तमम् दशकम्

हिरण्यगर्भोत्पत्ति वर्णनं

हिरण्यगर्भतपश्चरण वर्णनं

वैकुण्ठस्वरूप वर्णनं

भगवत्स्वरूपसाक्षात्कार वर्णनं

भगवदनुग्रह वर्णनं च

एवं देव चतुर्दशात्मकजगद्रूपेण जात: पुन-

स्तस्योर्ध्वं खलु सत्यलोकनिलये जातोऽसि धाता स्वयम्

यं शंसन्ति हिरण्यगर्भमखिलत्रैलोक्यजीवात्मकं

योऽभूत् स्फीतरजोविकारविकसन्नानासिसृक्षारस:

सोऽयं विश्वविसर्गदत्तहृदय: सम्पश्यमान: स्वयं

बोधं खल्वनवाप्य विश्वविषयं चिन्ताकुलस्तस्थिवान्

तावत्त्वं जगतां पते तप तपेत्येवं हि वैहायसीं

वाणीमेनमशिश्रव: श्रुतिसुखां कुर्वंस्तप:प्रेरणाम्

कोऽसौ मामवदत् पुमानिति जलापूर्णे जगन्मण्डले

दिक्षूद्वीक्ष्य किमप्यनीक्षितवता वाक्यार्थमुत्पश्यता

दिव्यं वर्षसहस्रमात्ततपसा तेन त्वमाराधित –

स्तस्मै दर्शितवानसि स्वनिलयं वैकुण्ठमेकाद्भुतम्

माया यत्र कदापि नो विकुरुते भाते जगद्भ्यो बहि:

शोकक्रोधविमोहसाध्वसमुखा भावास्तु दूरं गता:

सान्द्रानन्दझरी च यत्र परमज्योति:प्रकाशात्मके

तत्ते धाम विभावितं विजयते वैकुण्ठरूपं विभो

यस्मिन्नाम चतुर्भुजा हरिमणिश्यामावदातत्विषो

नानाभूषणरत्नदीपितदिशो राजद्विमानालया:

भक्तिप्राप्ततथाविधोन्नतपदा दीव्यन्ति दिव्या जना-

तत्ते धाम निरस्तसर्वशमलं वैकुण्ठरूपं जयेत्

नानादिव्यवधूजनैरभिवृता विद्युल्लतातुल्यया

विश्वोन्मादनहृद्यगात्रलतया विद्योतिताशान्तरा

त्वत्पादांबुजसौरभैककुतुकाल्लक्ष्मी: स्वयं लक्ष्यते

यस्मिन् विस्मयनीयदिव्यविभवं तत्ते पदं देहि मे

तत्रैवं प्रतिदर्शिते निजपदे रत्नासनाध्यासितं

भास्वत्कोटिलसत्किरीटकटकाद्याकल्पदीप्राकृति

श्रीवत्साङ्कितमात्तकौस्तुभमणिच्छायारुणं कारणं

विश्वेषां तव रूपमैक्षत विधिस्तत्ते विभो भातु मे

कालांभोदकलायकोमलरुचीचक्रेण चक्रं दिशा –

मावृण्वानमुदारमन्दहसितस्यन्दप्रसन्नाननम्

राजत्कम्बुगदारिपङ्कजधरश्रीमद्भुजामण्डलं

स्रष्टुस्तुष्टिकरं वपुस्तव विभो मद्रोगमुद्वासयेत्

दृष्ट्वा सम्भृतसम्भ्रम: कमलभूस्त्वत्पादपाथोरुहे

हर्षावेशवशंवदो निपतित: प्रीत्या कृतार्थीभवन्

जानास्येव मनीषितं मम विभो ज्ञानं तदापादय

द्वैताद्वैतभवत्स्वरूपपरमित्याचष्ट तं त्वां भजे

आताम्रे चरणे विनम्रमथ तं हस्तेन हस्ते स्पृशन्

बोधस्ते भविता न सर्गविधिभिर्बन्धोऽपि सञ्जायते

इत्याभाष्य गिरं प्रतोष्य नितरां तच्चित्तगूढ: स्वयं

सृष्टौ तं समुदैरय: स भगवन्नुल्लासयोल्लाघताम्

ॐ तत्सत् इति श्रीमन्नारायणीये सप्तमम् दशकम् समाप्तम्

श्री हरये नमः रमा रमण गोविन्द गोविन्दा

श्री कृष्णार्पणमस्तु